ပင်လယ်ရေပြင် တဖြည်းဖြည်း နိမ့်ဆင်းလာပြီး ကုန်းကမူများ၊ ကုန်းမြေများ ပေါ်ပေါက်လာခဲ့သည်။ ထိုကုန်းမြေများကို အိန္ဒိယလူမျိုးများက မိမိတို့ ဦးစွာရောက်ရှိခဲ့ကြောင်းနှင့် ရောက်ရှိခဲ့သည့် သင်္ကေတအဖြစ် လင်ဗန်းကိုးချပ်ကိုမြှုပ်နှံကာ ယင်းတို့ပိုင် နယ်မြေအဖြစ် သတ်မှတ်ခဲ့ကြသည်။ ထို့နောက် ဗမာလူမျိုးများ ရောက်ရှိလာခဲ့ကာ ထိုကုန်းမြေပေါ်တွင် ပဲနောက် ကိုးတင်းကို မြှပ်နှံခဲ့ကြသည်။ ယင်းနောက်တွင် ထိုကုန်းမြေပေါ်သို့ မွန်လူမျိုးများ ရောက်ရှိလာကာ အိန္ဒိယလူမျိုးများ မြှုပ်နှံခဲ့သော လင်ဗန်းကိုးချပ်နှင့် ဗမာလူမျိုးများ မြှုပ်နှံခဲ့သည့် ပဲနောက်ကိုးတင်း၏ အောက်တွင် သံကောက် (၉) ခုကို ထပ်မံမြှုပ်နှံခဲ့သည်။ ၎င်းကုန်းမြေကို အိန္ဒိယ၊ ဗမာ နှင့် မွန်လူမျိုးတို့က သူပိုင်ကိုယ်ပိုင် ငြင်းခုန်ခဲ့ရာ သိကြားမင်းက ပုဏ္ဏားအသွင်ဖြင့်ရောက်ရှိ ဖြေရှင်းခဲ့၍ မွန်လူမျိုးများ ပိုင်ဆိုင်ခဲ့သည်။