ဘုရားအမည်	ကန်သာယာရေလယ်ကျွန်းစေတီတော်မြတ်ကြီး
တိုင်းဒေသကြီး/ပြည်နယ်	ပဲခူးတိုင်းဒေသကြီး
Website Address	ဘုရားသမိုင်းများကြည့်ရန်
တည်နေရာ	ကန်တော်မင်္ဂလာလမ်း၊ သဲကုန်းမြို့
သမိုင်းကြောင်းရာ
သာသနာတော်သက္ကရာဇ် (၁၀၁)ခုနှစ်၊ ဒွတ္တပေါင်မင်းကြီးသည် သရေခေတ္တရာ ပြည်မြို့ကို တည်ထောင်တော်မူသည်။ မင်းကြီးသည် မြတ်စွာဘုရား သာသနာတော်ကို ကောင်းစွာသက်ဝင် ယုံကြည်သည့်အလျှောက် သာသနာတော် အစီးအပွားအလို့ငှါ ပစ္စည်းလေးပါး လှူဒါန်းခြင်း၊ ဓါတ်တော်၊ မွေတော်များကို ဌာပနာ၍ ဘုရားကြီး ၊ ဗောဗောကြီး ၊ ညဉ်းညဉ်း ၊ ယောယော၊ သောကြမာ၊ သရမ္မာ၊ မြင်ဗာဟု၊ မြသီတင်၊ မြသိန်းတန်စေတီတော်(၉)ဆူ တည်ခဲ့သည်။ မင်းကြီး၏ မြောက်နန်းစံ ဥမ္မာရဒေဝီက “ ဒွက္ကစံ ” ဟူသော သားတော်ကို၎င်း၊ အလယ်နန်းစံ ဗိဿနိုး မိဖုရားက “ ဒွတ္တရာဇ် ”ဟူသော သားတော်ကို၎င်း ဖွားမြင်ခဲ့သည်။ ဒွက္ကစံ၊ ဒွတ္တရာဇ ညီနောင်နှစ်ပါးသည် “ မဏိသေလ ”ခေါ် ရွှေကျောင်းဆောင်တောင်ကုန်း ပေါ်တွင် “ ရှင်စန္ဒာသီရိ ” နှင့် “ ရှင်စန္ဒာဂရာဇ် ” ဟူသော ရဟန္တာများအဖြစ် သီတင်းသုံးတော်မူကြ သည်။ မင်းကြီးသည် မဇ္ဇိုမဒေသ ဝေသာလီပြည် ဒုတိယသင်္ဂါယနာတင်သော ကာလာသောကမင်း နှင့် ထီးပြိုင် နန်းပြိုင် ဖြစ်သည်။ သရေခေတ္တရာခေါ် ရသေ့မြို့၏ အရံခုနှစ်တိုက်တွင် သဲကုန်းမြို့ သည် မိုးကုတ်တိုက်ထဲတွင် ပါဝင်သည်။ မင်းကြီးသည် သားရဟန္တာများ သီတင်းသုံးရာ ရွှေကျောင်းဆောင်သို့ ကြွလာစဉ် လမ်းခရီး တစ်ထောက်အဖြစ် ဤကန်သာယာနေရာတွင် တပ်စခန်းချရပ်နားစဉ် လျှိုမြောင်(၂)ခုအကြားတွင် သာယာလှပသော ကုန်ကမူလေးကို တွေ့မြင်ရသဖြင့် ကုန်းကမူထက်တွင် ဉာဏ်တော်(၇)တောင် အမြင့်ရှိသော စေတီတော်ကိုတည်၍ ဓါတ်တော်၊ မွေတော်တို့ကို ဌာပနာတော်မူခဲ့သည်။ လျှိုမြောင် ကို ပိတ်၍ တစ်ဖက်ပိတ်ဆည်အဖြစ် ဆည်ဖို့တော်မူခဲ့သည်။ ဆည်ဖို့ရာတွင် တိုက်နယ်များမှ တိုက်မှူးကြီးများကလည်း ဝိုင်းဝန်းကူညီဆောင်ရွက်ခဲ့ကြသည်။