ဘုရားအမည်	ဆွေးနွေးစေတီတော်မြတ်ကြီး
တိုင်းဒေသကြီး/ပြည်နယ်	ပဲခူးတိုင်းဒေသကြီး
Website Address	ဘုရားသမိုင်းများကြည့်ရန်
တည်နေရာ	ပြည်မြို့
သမိုင်းကြောင်းရာ
(ရည်ညွှန်းစာ: ဆွေးနွေးစေတီတော်မြတ် ဂေါပကအဖွဲ့မှ ပေးပို့သောမှတ်တမ်းမှ ကူးယူဖော်ပြထားပါသည်။) သာသနာတော်နှစ် (၁၂၆)ခုနှစ်၊ ဘီစီ(၄၁၈)ခုနှစ်တွင် သရေခေတ္တရာ ပြည့်ရှင် ဒွတ္တပေါင်မင်းကြီးသည် နဝဝါသီ(ခေါ်)ပြည်မြို့တွင် လေးဆူဓါတ်ပျော် ရွှေဆံတော်စေတီတော်မြတ်ကို ဒုတိယမြောက်ဘုရား ဒါယကာအဖြစ် တပေါင်း လပြည့်နေ့၌ ယနေ့ဖူးတွေ့ရသည့် ဉာဏ်တော် အမြင့်နီးပါးရှိ စေတီတော်ကိုတည်ထားခဲ့ပါသည်။ ရွှေဆံတော်စေတီတော် မြတ်ကြီးတည်ထားရာ သုဒဿနတောင်တော် ပတ်လည်တွင် ကိုးနဝင်းကျေ အရံတောင်ကိုးလုံး၊ ယင်းအရံတောင်ပေါ်တွင်စေတီကိုးဆူစသည်ဖြင့်၊ အရာရာကို ပြည်မြို့တွင် ကိုးနဝင်းကျေ စီမံဆောင်ရွက် ခဲ့ပါသည်။ ထိုသို့ စီမံဆောင်ရွက်ပြီးနောက် မင်းကြီးသည် မိဖုရားများ၊ သားတော်၊ သမီးတော် များ၊ ဆွေတော်မျိုးတော်၊ မူးကြီးမတ်ရာများနှင့် နန်းရင်ပြင်၌စံစားနေစဉ် မိဖုရားများက မင်းကြီးအား လျှောက်ကြားသည်မှာ မင်းကြီးအနေဖြင့် ကုသိုလ် ကောင်းမှုများကို ကိုယ်တိုင် ကိုယ်ကျ အားရဝမ်းမြောက်စွာ လှူဒါန်းမှုအစုစုကို ပြုလုပ်အောင်မြင်ခဲ့ပြီးဖြစ်ပါသည်။ မိဖုရားများ၊ ဆွေတော် မျိုးတော်များကလည်း ကိုယ်တိုင်ကိုယ်ကျ ရွှေဆံတော်စေတီတည်ထားရာ ပြည်မြို့တွင် ဘုရားဒါယကာ၊ ဒါယိကာမများအဖြစ် ဆောင်ရွက်လှူဒါန်း ခွင့်ပြုပါရန် လျှောက်ထားသည်ကို မင်းကြီးသည် ကျေနပ်ဝမ်းမြောက်စွာ လက်ခံခွင့်ပြုခဲ့ပေသည်။ ဤသို့ ဒွတ္တပေါင်မင်းကြီး၏ ခွင့်ပြုတော်မူချက်အရ မင်းကြီး၏ မြောက်နန်းမတော် မိဖုရား ဥမ္မာရဒေဝီ၏ မောင်တော် နန္ဒသူရိယမင်းသား ပြည်ဘုရင်သည် သာသနာတော်နှစ် (၁၂၇)ခုနှစ်၊ တန်ဆောင်မုန်းလတွင် လိုဏ်ခံမုခ် လေးမုခ်ပါ ဘုရားကျောင်းစေတီတစ်ဆူကို ပြည်မြို့တွင် တည်ထားကိုးကွယ် ခဲ့ပါသည်။ ပြည်ဘုရင် နန္ဒသူရိယမင်းသားသည် မိမိတည်ထားသည့် ဘုရားကျောင်း စေတီတော်မြတ်ကြီး၏ လိုဏ်ခံမုခ် အတွင်းနံရံပတ်လည်တွင် ဆေးရေးပန်းချီများဖြင့် မဟာဗုဒ္ဓဝင်နိပါတ်တော်ကို နံရံဆေးရေး ပန်းချီများရေးဆွဲလှူဒါန်းသည်ကို အကြောင်းပြု၍ “ကျောင်းဆေးရေးဘုရား” ဟူ၍ ဘွဲ့တော်တင်တော်မူခဲ့ပေသည်။သို့ပါ၍ ကျောင်းဆေးရေးစေတီတော်မြတ်ကြီး(ခေါ်)ဆွေးနွေးစေတီတော်မြတ်ကြီး၏ ပထမ ဘုရားဒါယကာမှာ ပြည်ဘုရင် နန္ဒသူရိယမင်းဖြစ်ကြောင်း လေ့လာသိရှိ မှတ်သားရပါသည်။