ဘုရားအမည်	ဓမ္မရံကြီးဘုရား
တိုင်းဒေသကြီး/ပြည်နယ်	မန္တလေးတိုင်းဒေသကြီး
Website Address	ဘုရားသမိုင်းများကြည့်ရန်
တည်နေရာ	ညောင်ဦးခရိုင်
သမိုင်းကြောင်းရာ
ဓမ္မရံကြီးဘုရားသည် မန္တလေးတိုင်းဒေသကြီး၊ ပုဂံရှေးဟောင်းယဉ်ကျေးမှုနယ်မြေတွင် ထုထည်ကြီးမားလျက် ခန့်ညားထည်ဝါစွာ တည်ဆောက်ထားသော ဘုရားကြီးဖြစ်သောကြောင့် ပုဂံတွင် ကြီးကျယ်ထင်ရှားသော ကြီး (၉) ကြီး၊ ဘုရား (၉) ဆူတို့တွင် တစ်ဆူအပါအဝင် ဖြစ်ခဲ့လေသည်။ ထု-ဓမ္မရံ၊ ဉာဏ်-သဗ္ဗညု၊ အနု-အာနန္ဒာ၊ တန်ခိုး-ရွှေစည်းခုံ ဟူသော အဆိုအရ ဓမ္မရံကြီးဘုရားသည် ပုဂံဒေသတွင် ထုထည်အကြီးမားဆုံး ရှေးဟောင်းဘုရား တစ်ဆူဖြစ်ပြီး အာရုံခံ မုခ်လေးခုနှင့်အပြိုင် နှစ်ထပ်စင်္ကြံလမ်းပါရှိသော ဘုရားတစ်ဆူဖြစ်ပါသည်။ ဓမ္မရံကြီးဘုရား (ဘုရားအမှတ်-၇၇၁/ ၃၆၅)သည် ကွမ်းတောင်ပေါက် လိုဏ်တစ်ဆင့်ဂူဘုရားကြီးဖြစ်ပြီး အေဒီ (၁၁၆၃-၁၁၆၅)တွင် နရသူမင်းသည် (၃)နှစ်အတွင်း ပြီးစီးအောင် အစောတလျင် တည်ဆောက်ခဲ့သည့် ဘုရားကြီးဖြစ်ပါသည်။ မဟာရာဇဝင်နှင့် မှန်နန်းရာဇဝင်တို့ကမူ နရသူမင်းကြီး သည် တည်ဆောက်ဆဲကာလတွင် သီဟိုဠ်သားတို့ လာရောက်လုပ်ကြံသဖြင့် နတ်ရွာစံလွန်ရ ကြောင်းဆိုပါသည်။ မှန်နန်းရာဇဝင်ကြီးတွင် “ကောင်းမှုတော် ဓမ္မရံကို ကြောက်ရွံ့ခြင်းပြင်းသော ကြောင့် စေ့စပ်သေချာလွန်း၍ မပြီးလေ” ဟုဆိုပါသည်။ ဓမ္မရံကြီးဘုရားဟု အမည်တွင်သည်မှာ နရပတိစည်သူ(စည်သူ-၂)လက်ထက် ဓမ္မရံသီအမည်ရှိ မထေရ်တစ်ပါး ဘုရားတံတိုင်းဝင်းအတွင်း အနောက်ဘက်ထောင့်ရှိ အုတ်ကျောင်းတွင် သီတင်းသုံးခဲ့သည့်အတွက် ထိုမထေရ်ကို အကြောင်းပြု၍ ဓမ္မရံသီဘုရားဟု ခေါ်ခဲ့ကြရာမှ ကာလကြာသော် ဓမ္မရံကြီးဟု ပြောင်းလဲအမည်တွင်ခဲ့သည်ဟုလည်း ဆိုကြပါသည်။