ဘုရားအမည်	ဖိုးဦးတောင်စေတီတော်မြတ်ကြီး
တိုင်းဒေသကြီး/ပြည်နယ်	ပဲခူးတိုင်းဒေသကြီး
Website Address	ဘုရားသမိုင်းများကြည့်ရန်
တည်နေရာ	ပဲခူးတိုင်းဒေသကြီး၊ ပြည်ခရိုင်၊ပန်းတောင်းမြို့နယ် မြောက်ဘက်စွန်း ရွာသာယာကျေးရွာအုပ်စု ၊ ရွာသာယာကျေးရွာ
သမိုင်းကြောင်းရာ
(ဖိုးဦးတောင်ဂေါပကအဖွဲ့မှပေးပို့သောသမိုင်းကြောင်းများဖြစ်ပါသည်။) မြတ်စွာဘုရားရှင်လက်ထက်က သီဟပဗ္ဗတတောင်ဟုလည်းကောင်း၊ ပွေးဖိုဦးတောင်၊ ပွေးဦးတောင် ထိုမှ ဖိုးဦးတောင်ဟု အမည်တွင်ခဲ့ပါသည်။ ဂေါတမမြတ်စွာဘုရားရှင်သည် ဗာရာဏသီပြည်၌ ပထမဝါဆိုပြီးနောက် သီဟိုဠ်ကျွန်းသို့ ကြွတော်မူ၏။ ထိုမှ သီဟပဗ္ဗတခေါ် ဖိုးဦးတောင်သို့ ကြွတော်မူပါသည်။ ဖိုးဦးတောင်တွင် နေထိုင်ကြသော သမ္ဘူလဘီလူးမင်းနှင့် အရံတစ်သိန်း၊ ဝေသာမိတ္တ ဘီလူးမင်း၊ ဣဒ္ဓိမန္တဘီလူးမင်း၊ ဝေလုကန္တဘီလူးမင်းတို့အား တရားရေအေး တိုက်ကျွေးရာ ဘီလူးမင်းတို့နှင့် အခြွေအရံများ သရဏဂုံ၊ ပဉ္စသီလ တည်ကြလေသည်။ ထို့အတူ ဧရာပထနဂါးမင်းနှင့် ကုဋေတစ်သိန်းရှိသော နဂါးအပေါင်းတို့သည်လည်း မြတ်စွာဘုရား ထံမှ တရားနာကြားကြပြီး သရဏဂုံ၊ ပဉ္စသီလတည်ကြလေသည်။ မြတ်စွာဘုရားနှင့် ဘီလူးနဂါးတို့ တွေ့ဆုံ ဖူးမြော်စဉ် ဧရာပထနဂါးမင်းက တစ်စုံတစ်ခုသော ကိုးကွယ်ရာပေးသနားတော်မူပါရန် လျှောက်ထား တောင်းပန်သည်ဖြစ်၍ မြတ်စွာဘုရားက ဆံတော်ဓါတ်မြတ် လေးဆူ ပေးသနားတော်မူလေ၏။ ထိုအခါ သမ္ဘူလဘီလူးမင်းနှင့် ကျန်ဘီလူးမင်းတို့ကပါ လျှောက်ထားတောင်းပန်သည်ဖြစ်ရာ မြတ်စွာဘုရားက ဥဏ္ဏလုံ မွေရှင်တော်နှစ်ဆူ၊ သုပုပ္ဖိတ၊ ကုမုဒ၊ ပဒုမ၊ ပဏ္ဍရိက လေးပါးသောအမည်ရှိသည့် မွေရှင်တော်နှစ်ဆူ၊ ရင်အုပ်တော်မှ သက္ကဿမကုဋဟူသော မွေရှင်တော်နှစ်ဆူ၊ လက်ခုံတော်နှစ်ဖက်တို့မှ သာရစိန္တမွေရှင်တော် နှစ်ဆူတို့ကို ပေးသနားတော်မူ၏။ ဧရာပထနဂါးမင်း၏ စေတီတည်ထားကိုးကွယ်ရန် လျှောက်ထားတောင်းပန်မှုကြောင့် အမျိုးလေးပါး တို့ ကိုးကွယ်စေခြင်းငှာ လူ့ပြည်၌ပင်လျှင် စေတီတည်ထားအပ်သည်ဟု မိန့်ကြားပြီး ကကုသန်မြတ်စွာဘုရား ၏ ဒုကုဋ်သင်္ကန်းတော်၊ ကောဏာဂုံမြတ်စွာဘုရား၏ အံသကိုဋ်တော်၊ ကဿပဘုရား၏ ခါးပန်းတော် တို့နှင့်အတူ ဆံတော်မြတ်လေးဆူကို ဌာပနာထားပြီး စေတီတည်ထားကိုးကွယ်ရန် ဗျာဒိတ်ပေးတော်မူသည်။ ထို့နောက် အဇိက၊ ဘလ္လိက ကုန်သည်ညီနောင်တို့နှင့် ပြည်မြို့ အရပ်ရှိ သုဒဿနဂီရိတောင်တော်တွင် စေတီတည်ထားခဲ့ရာ လေးဆူဓါတ်ပျော် ရွှေဆံတော်ဟု အမည်တွင်ခဲ့လေ၏။ ထို့နောက် မွေရှင်တော်ဓါတ် (၇)ဆူတို့အား ငါဘုရားခြင်္သေ့မင်းဖြစ်စဉ်က နေခဲ့ဖူးသော ဤသီဟပဗ္ဗတမည်သော တောင်တောတွင် ဌာပနာ၍ စေတီတည်ထားကိုးကွယ်ရန် မိန့်တော်မူရာ ယခုအခါ ဖိုးဦးတောင်ဟု အမည်တွင်ခဲ့လေ၏။ မြတ်စွာဘုရားသည် ငါးဝါမြောက်တွင် သံဃာတော်အပါးငါးရာခြံရံလျှက် ဖိုးဦးတောင်သို့ ဒုတိယ အကြိမ်ကြွတော်မူခဲ့သည်။ ဖိုးဦးတောင်တွင် နေထိုင်သော “ဒွတ္တ”မည်သော ပွေးဖို ပွေးမတို့သည် ပထမ အကြိမ်ကြွတော်မူစဉ်က မဖူးမြော်လိုက်ရဘဲ ဒုတိယအကြိမ်တွင် ဖူးမြော်ခဲ့ကြရသည်။ ပွေးမမှ ပွေးဖိုအပေါ် အထင်အမြင်လွဲမှားပြီး မြတ်စွာဘုရားထံ ဆုတောင်းမှားခဲ့ကြသဖြင့် နောင်သရေခေတ္တရာထွန်းကားချိန် တွင် ဒွတ္တပေါင်မင်းကြီးနှင့် ဗိဿနိုးပန်ထွာမိဖုရားတို့တိုင် အငြိုးမပြေဖြစ်ခဲ့ကြသည်။