ဘုရားအမည်	ဘုရားထောင်ဂူဘုရား(သရေခေတ္တရာမြို့ဟောင်းဇုန်ရှိဒွတ္တပေါင်မင်းကြီးတည်ထားခဲ့သောဘုရား)
တိုင်းဒေသကြီး/ပြည်နယ်	ပဲခူးတိုင်းဒေသကြီး
Website Address	ဘုရားသမိုင်းများကြည့်ရန်
တည်နေရာ	သရေခေတ္တရာမြို့ဟောင်းအတွင်း ၊ ပြည်မြို့။
သမိုင်းကြောင်းရာ
(ရည်ညွှန်းစာ : ရှေးဟောင်းသုတေသနနှင့် အမျိုးသားပြတိုက်ဦးစီးဌာနမှ ပေးပို့ထားသော မှတ်တမ်းမှ ကူးယူဖော်ပြထားခြင်းဖြစ်ပါသည်။) ဘုရားထောင်ဂူဘုရားသည် အေဒီ(၉-၁၀)ရာစုခန့်က တည်ဆောက်ခဲ့သော လိုဏ်ဘုရားတစ်ဆူဖြစ်ပါသည်။ ပါးစပ်ရာဇဝင်အရ ဗိုလ်ခြေတစ်ထောင်တည်ထားခဲ့သည်ဟု သိရသည်။ ဘုရားထောင်ဘုရားသည် အလျား(၄၁)ပေ (၈)လက်မ၊ အနံ(၄၁)ပေ(၈)လက်မ၊ ဉာဏ်တော်အမြင့်(၃၂)ပေခန့်ကျန်ရှိသည်။ ဘုရား၏တိုက်မနံရံသည် (၈)ပေခန့်ထုထည် ရှိပြီး လိုဏ်ပတ်လမ်းအကျယ်မှာ ပျမ်းမျှ(၅)ပေ(၇)လက်မ၊ အလယ်တွင် (၁၀)ပေပတ်လည်ရှိ မဏ္ဍိုင်တစ်ခုပါရှိကာ အဆိုပါမဏ္ဍိုင်နှင့် တိုက်မနံရံကြီးကို သပ်အုတ်များဖြင့် နှစ်ထပ် ပေါင်းကူးစီထားကြောင်း လက်ကျန်အထောက်အထားများ တွေ့ရှိရပါသည်။ အလယ်မဏ္ဍိုင် နှင့် တိုက်မအတွင်းနံရံများတွင် အုတ်ရိုးဆင့်တန်းများပြုလုပ်ထားပြီး အဆိုပါဆင့်တန်းများ အတွင်း ထုံးသရွတ်ဖြင့်ကပ်၍ ထိုင်တော်မူသဲကျောက်ဆင်းတုတော်များကို ပူဇော်ထား ပါသည်။ အချို့နေရာများတွင် ဗုဒ္ဓဆင်းတုတော်များကျန်ရှိပြီး အချို့နေရာများတွင် ဘုရား ဆင်းတုတော်ကပ်ထားသည့် ထုံးသရွတ်များသာ ကျန်ရှိနေပါသည်။ ဘုရားလိုဏ်ပတ်လမ်း အတွင်း အလင်းရောင်ကောင်းစွာရရှိရန် မြင်ကွင်းထင်ရှားမှု မရှိစေသော အလူမီနီယမ် အမဲရောင်ဖရိန်များတပ်ဆင်ကာ Tempered Glass (8 mm) + Laminated Glass (6 mm)မှန်အမိုးမိုးထားပါသည်။ အရှေ့ဘက်တွင် ဝင်ပေါက်တစ်ပေါက်ပါရှိပြီး မြောက်ဘက်၊ တောင်ဘက်နှင့် အနောက်ဘက်တို့တွင် မုခ်ပေါက်ငယ်တစ်ခုစီ ပါရှိသည်။ ဘုရားထောင် ဘုရား၏ အပေါ်ပိုင်းတွင် ပစ္စယံသုံးဆင့်နှင့် တိုက်မနံရံ အပေါ်တွင် အရံစေတီများ တည်ထား ခဲ့ရာ ယခုအခါ မြောက်ဘက်ပစ္စယံပေါ်တွင် အရံစေတီသုံးဆူသာ ကျန်ရှိတော့သည်။