ဘုရားအမည်	မဟာဗောဓိဘုရား
တိုင်းဒေသကြီး/ပြည်နယ်	မန္တလေးတိုင်းဒေသကြီး
Website Address	ဘုရားသမိုင်းများကြည့်ရန်
တည်နေရာ	မဟာဗောဓိဘုရားကြီးသည် မန္တလေးတိုင်းဒေသကြီး၊ ညောင်ဦးခရိုင်၊ ပုဂံရှေးဟောင်းယဉ်ကျေးမှုနယ်မြေ၊ ပုဂံမြို့ဟောင်း၊ နန်းတော်ရာသစ်၏ အနောက်ဘက်၊ ယွန်းပညာကောလိပ်အနီးတွင် တည်ရှိပါသည်။
သမိုင်းကြောင်းရာ
မဟာဗောဓိဘုရားသမိုင်း “နတ်ရှင်မင်းများ၊ နားတောင်းများမှာ ကမ်းနားတော်ရာ၊ စေတ္တနာ၊ ဗောဓိ၊ ဂေါဓပလ္လင် နောက်ပြင်အပြီး ထီးလိုမင်းလို သည်ကို သိမျှော် ဂုဏ်ထင်ပေါ်၏” (ပုဂံဘုရားစဉ်လင်္ကာ) ပုဂံပြည့်ရှင် ဇေယျသိင်္ခ(ခေါ်) နားတောင်းများမင်းကြီးသည် ကမ်းနား တော်ရာဘုရား၊ စေတနာဘုရား၊ မဟာဗောဓိဘုရား၊ ကန်တော့ပလ္လင်ဘုရား၊ ထီးလိုမင်းလိုဘုရား စသည့်ဘုရားများ တည်ထားကိုးကွယ်တော်မူခဲ့ပါသည်။ မဟာဗောဓိဘုရားကြီးကို နားတောင်းများမင်းကြီးသည် မြန်မာသက္ကရာဇ် ၅၇၇- ခုနှစ် (ခရစ်သက္ကရာဇ် AD-1215)တွင် ဗုဒ္ဓဂါယာရှိ မဟာဗောဓိစေတီတော် ပုံကို နမူနာယူ၍ ပုဂံမူဖြင့် တည်ထားကိုးကွယ်ခဲ့သဖြင့် ပုဂံတွင် ထူးခြားသည့် စေတီအဖြစ် ထင်ရှားခဲ့ပါသည်။ ပုဂံသားတို့သည် မဇ္ဈိမဒေသ ဗုဒ္ဓဂါယာရှိ မဟာဗောဓိစေတီတော် ပျက်စီးယိုးယွင်းသည်ကို သွားရောက်ပြင်ဆင်ခဲ့ရာမှ မဟာဗောဓိဘုရားပုံစံကို ရရှိခဲ့ကြသည်။ ထို့ကြောင့် မဟာဗောဓိစေတီတော် ဝန်းကျင်တွင် သတ္တဌာနဆိုင်ရာ အမှတ်အသား အဆောက်အဦများကို အိန္ဒိယ နိုင်ငံ ဗုဒ္ဓဂါယာကဲ့သို့ ထည့်သွင်းတည်ဆောက်ထားသည်။ အာသောကမင်းကြီး သည် ဗုဒ္ဓဂါယာ မဟာဗောဓိစေတီတော်ကြီးကို သိဒ္ဓတ္ထဂေါတမဗုဒ္ဓပွင့်မှီရာ မဟာဗောဓိညောင်ပင်တွင် တည်ထားခဲ့သဖြင့် “မဟာဗောဓိစေတီတော်ကြီး” ဟု ဘွဲ့အမည်ရရှိခဲ့ပြီး နားတောင်းများမင်းကြီးသည်လည်း ဗုဒ္ဓဂါယာရှိ မဟာဗောဓိ စေတီတော်နှင့် ပုံစံတူတည်ထားခဲ့၍ “ပုဂံမဟာဗောဓိစေတီတော်ကြီး” ဟု ဘွဲ့မည်တူ ခံယူထားခြင်းဖြစ်ပါသည်။