ဘုရားအမည်	မဟာအတုလအနန္တမုနိမြတ်စွာဘုရားကြီး
တိုင်းဒေသကြီး/ပြည်နယ်	ပဲခူးတိုင်းဒေသကြီး
Website Address	ဘုရားသမိုင်းများကြည့်ရန်
တည်နေရာ	ထုံးဘိုမြို့၊ပန်းတောင်းမြို့နယ်
သမိုင်းကြောင်းရာ
(ဂေါပကအဖွဲ့ဝင်များမှပေးပို့သောအကြောင်းအရာများဖြစ်ပါသည်။) ကောဇာသက္ကရာဇ် ၁၂၅၄ ခုနှစ်၊ တန်ခူးလပြည့်ကျော် (၇)ရက် တနင်္လာနေ့ နံနက်(၄)ချက်တီးကျော်၊၁ပါဇ်၅ဗီဇနာရပြန်စရာအချိန်၌ထုံးဘိုမြို့ တောင်ငယ်ကုန်းတော် စူဠရတနာမေယျပဗ္ဗတ္တတောင်ဟုလည်းကောင်း၊ နွားမလှည့်ကူးတောင်ဟု လည်းကောင်း နှမလယ်ခေါ် တောင်စွန်းပေါ်တွင် တည်ထား ကိုးကွယ် ပူဇော်ခဲ့ပါသည်။ ကုန်းဘောင်ခေတ် သာသနာပိုင် အမိန့် စာချွန်တော်ရ ထုံးဘိုရွာလယ်၊ယွန်းကျောင်းတိုက် အမည်ရှိ နောင်အခါ မြသိန်းတန်စေတီကို အစွဲပြု၍ မြသိန်းတန်ကျောင်းတိုက် ဂိုဏ်းချုပ် စာတော်ဆရာတော်ကြီး ဦးမဉ္ဇူသာရကိုယ်တိုင် ကြီးမှူးဦးဆောင်ကာ နယ်လေးရပ်မှ ဒါယကာ ဒါယိကာမတို့ လှူဒါန်းအပ်သော ဓာတ်သတ္တု လှူဖွယ်တို့စုစည်း၍ မန္တလေးမြို့ ပန်းတဉ်းပညာရှင်များအား ခေါ်ယူပြီး မြသိန်းတန်ကျောင်းတိုက် စက်ကုန်းနေရာတွင် ရွှေ၊ ငွေ၊ ကြေးနီ၊ သံ၊ သံတွဲ ပဉ္စလောဟာ ငါးမျိုးသော သတ္တုရည်တို့ဖြင့် သွန်းလောင်း ခဲ့ပါသည်။ လှူဒါန်းမှု သတ္တုအလေးချိန်မှာ ရွှေစင် (အသပြာလေးရာ) ၄ ပိဿာ၊ ငွေစင်ပိဿာ ၂ဝဝဝ၊ ကြေးနီ ပိဿာချိန် ၆၂၅၅၅၊ သံချိန် ၁ဝဝ၆ ပိဿာ၊ သံလွဲစင် ပိဿာ (၁၀၀၀)တို့ကို စုပေါင်း အရည်ကျို သွန်းလောင်းခဲ့ပါသည်။ ဘုရားကြီး၏ ကိုယ်တော် အတိုင်းအတာမှာ ဉာဏ်တော်အမြင့် (၁၀တောင်၂မိုက်)၊ မဏိလုံးဝန်းတော် ( ၇တောင်၄သစ်)၊ ကိုယ်လုံးဝန်းတော် (၇တောင်)၊ ရောင်လျံတော် (၂တောင်)၊ မျက်နှာတော် (၂တောင်၁ထွာ)၊ သင်းကျစ်တော်အလျား (၄တောင်၈သစ်)၊ နားရွက်တော် (၈တောင် ၂မိုက်)၊ ထက်ဝယ်တော်အချင်း (၇တောင်၈သစ်)၊ ဓမ္မခန်အမြင့် (၂မိုက်) တို့ ဖြစ်သည်။ ဘုရားကြီးကို ၇၂၉၇ ပိဿာဖြင့် သွန်းလောင်းခံကာ ပိုလျံသော သတ္တုရည်တို ့ကို ညီတော် မုနိဘွဲ့များတပ်၍ မုနိပွားများ သွန်းလောင်းစေရာ (၁)ရွှေကျောင်း (၂)နန်းကျောင်း (၃)လယ်ပြင်ကျောင်း (၄)တောင်ထိပ်ကျောင်း (၅)ဘုရားကြီးကျောင်း (၆)ကျီးတောကျောင်း တို ့တွင် မုနိ(၆)ဆူ ထပ်မံ ရရှိခဲ့သည်ဟု သိရပါသည်။