ဘုရားအမည်	ရဟန္တာ(၈၀)ရှေးဟောင်း မဟာသိမ်တော်မြတ်ကြီး
တိုင်းဒေသကြီး/ပြည်နယ်	ပဲခူးတိုင်းဒေသကြီး
Website Address	ဘုရားသမိုင်းများကြည့်ရန်
တည်နေရာ	ပြည်ခရိုင်၊ ရွှေတောင်မြို့နယ်၊ နွားမယံကျေးရွာအုပ်စု၊ ဖိုးသိန်းတန်ကျေးရွာ
သမိုင်းကြောင်းရာ
(ရည်ညွှန်းစာ : ရဟန္တာ(၈၀)ရှေးဟောင်းမဟာသိမ်တော်မြတ်ကြီး ဂေါပကအဖွဲ့မှ ပေးပို့သောမှတ်တမ်းမှကူးယူဖော်ပြထားပါသည်။) ရဟန္တာ(၈၀)ရှေးဟောင်းမဟာသိမ်တော်မြတ်ကြီးအား အရှင်မဟာကဿပမဟာထေရ်သည် ပထမ သင်္ဂါယနာတင်တော်မူပြီး သာသနာနှစ် သက္ကရာဇ်ညီစေရန် ဆောင်ရွက်တော်မူသည်။ အဇာတသတ်မင်းကြီး သည် သက္ကရာဇ် (၁၄၈)ခုကို ဖြို၍ ဘုရားပရိနိဗ္ဗာန်စံဝင်ပြီး သာသနာနှစ်(၁)နှစ်ကို ဆောင်ရွက်တော်မူသည်။ မြတ်စွာဘုရား၏ ဓာတ်တော်များကို ရှစ်ပြည်ထောင်သောမင်းတို့၏ တည်ထားသော စေတီတော်တို့မှ မိစ္ဆာဒိဌိဂိုဏ်းကြီး ဖြိုဖျက်မည့် အကြံကို အရှင်မဟာကဿပ၏ ဉာဏ်တော်၌ ထင်တော်မူခြင်းကြောင့် အဇာ တသတ်မင်းကို အကျဉ်းမျှရှင်းပြ၍ “မြတ်သောမင်းကြီး တစ်ခုသောဓာတ်တော်ထားရာကိုပြုလော့” ဟုမိန့်တော်မူပါသည်။ မိန့်တော်မူသည့်အတိုင်း အဇာတသတ်မင်းသည် စစ်သည်ဗိုလ်ထုအလုံးအရင်းတို့နှင့် ရွှေ၊ ငွေ၊ ဘဏ္ဍာများကို ယူဆောင်ကာ ရာဇဂြိုလ်မြို့ အရှေ့တောင်အရပ်သို့ ရောက်ရှိ၍ အတောင် (၈၀)တူးခြင်း၊ တူးရသောမြေဖြင့်အုတ်ဖုတ်ခြင်း၊ စေတီတော်(၈၀)တည်ထားခြင်း၊ (၈၀)မှ တစ်ဆူ သော စေတီကို ဌာပနာသွင်း၍ တည်ထားတော်မူခဲ့သည်။ ပိုသော ရွှေ၊ ငွေ၊ ဘဏ္ဍာ၊ မင်းမြောက်တန်ဆာ ငါးပါး တို့ကို စေတီတစ်ဆူ၌ ဌာပနာထားခဲ့သည်။ထိုသို့ထားခဲ့သောစေတီသည် နှစ်ပေါင်း(၂၀၀၀)ကျော်သည့် အခါ တောတောင်ကြီးဖြစ်၍ ဖိုးသိန်းတန်ကျောင်းသားများက မြွေတွင်းဟုတူးကာ ရွှေအိုး၊ငွေအိုးအဇာတသတ်မင်း ၏ စလွယ်၊ မင်းမြှောက်တန်ဆာတို့ကိုတွေ့၍ ဖျက်စီးကြကုန်၏။ ခုနှစ်သက္ကရာဇ်မှာ ဗိုလ်ချုပ်ကြီးနေဝင်း လက်ထက် (၄.၄.၁၉၈၄)ရက်နေ့ဖြစ်သည်။ အရှင်မဟာကဿပကြီးသည် လျှို့ဝှက်ဓာတ်တော်တိုက်တည်ထားရန် ရှစ်ပြည်ထောင်သောမင်းတို့ ၏ ပင့်ဆောင်သွားသော ၊ တည်ထားသော စေတီအတွင်းမှ ဓာတ်တော်များကို ပင့်ဆောင်ရန် ရဟန္တာ(၈၀)တို့ အား တာဝန်ယူပေးရန် လျောက်ထားသောအခါ အရှင်သာရိပုတ္တရာ၊ အရှင်မဟာမောဂ္ဂလာန် အစရှိသော အသီတိရှစ်ကျိပ်ရဟန္တာတို့သည် တန်ခိုးတော်ဖြင့် စေတီများ မဖောက်ဘဲနှင့် ဓာတ်တော်များပင့်ဆောင် လာ ၍ အဇာတသတ်မင်း၏ လျှို့ဝှက်ဌာပနာတိုက်၌ တည်ထားတော်မူလေသည်။ ရဟန္တာများကို မိမိတို့၏ရုပ် ပွားတော်များကို ရင်ငွေ့တော်လှုံ၍ ဓာတ်တော်တိုက်၏အပေါ်၌ အဓိဌာန်ပြုထားခဲ့ပါသည်။ အဆိုပါရဟန္တာ(၈၀)သိမ်တော်သည် မူလက တိမ်မြုပ်ပျောက်ကွယ်လျက်ရှိသော်လည်း မှဲ့ရှင်ဆရာ တော်ကြီး၏ အိပ်မက်အရ (၁၈.၄.၂၀၀၄)ရက်နေ့မှစ၍ တံတိုင်းကြီး၏ ရာဟုထောင့်မှစတင်တူးဖေါ်ရာ (၁၀)ရက်မြောက်ဖြစ်သော (၂၈.၄.၂၀၀၄)ရက်နေ့တွင် ပထမဦးစွာ သျှောင်တော်မပါသော ဦးခေါင်းတော်နှင့် ရုပ်ပွားတော်(၁)ဆူကို စတင်တွေ့ရှိရပါသည်။ဆက်လက်တူးဖေါ်ရာ အရှေ့တည့်တည့် တစ်လံမျှသောနေရာ တွင် အုတ်တွင်းခွက်တစ်ခုနှင့် ရုပ်ပွားတော်(၁)ဆူကို ထပ်မံတွေ့ရှိရပါသည်။ထပ်ဆင့်၍ဆက်လက်တူးဖေါ်ရာ ယင်းကဲ့သို့ သျှောင်မပါသော ဦးခေါင်းတော်နှင့် ရုပ်ပွားတော်များကိုလည်း ဆက်ကာဆက်ကာတွေ့လာရပြီး နောက် မှဲ့ရှင်ဆရာတော်ကြီးမှ ပရိသတ်တို့အား ရဟန္တာရုပ်ပွားတော်တွေဖြစ်သည်ဟု မိန့်ကြားလိုက်သည်။ ဆက်လက်၍ တံတိုင်းပတ်ပတ်လည်ပြိုကျပျက်စီးနေသော အုတ်ကုန်းတန်းအား အရှေ့၊အနောက်၊ တောင်၊မြောက် လေးဘက်လေးတန် ဆက်လက်တူးဖေါ်သောအခါ (၂၈.၄.၂၀၀၄) ရက်နေ့တွင် ရုပ်တုတော် (၃၅)ဆူ၊ (၂၉.၄.၂၀၀၄)ရက်နေ့တွင် (၄၅)ဆူ၊ စုစုပေါင်းရဟန္တာရုပ်တုတော် (၈၀)ဖူးတွေ့လိုက်ရပါသည်။ ထို ရဟန္တာများသည် ဘုရားရှင်လက်ထက်တော်အခါက အသီတိရှစ်ကျိပ်ဟုအမည်တွင်သော အရှင်သာရိပုတ္တရာ အမှူးရှိသော လက်ယျာတော်ရံရဟန္တာကြီး (၄၀)နှင့် အရှင်မဟာမောဂ္ဂလာန်အမှူးပြုသော လက်ဝဲတော်ရံ ရဟန္တာကြီး(၄၀) ရဟန္တာကြီးများဖြစ်ကြောင်း သိသာထင်ရှားနေပါသည်။