ဘုရားအမည်	ရှင်ပင်ခရုစေတီတော်(ရှင်ကိုးရှင်ဘုရား)
တိုင်းဒေသကြီး/ပြည်နယ်	တနင်္သာရီတိုင်းဒေသကြီး
Website Address	ဘုရားသမိုင်းများကြည့်ရန်
တည်နေရာ	ထားဝယ်
သမိုင်းကြောင်းရာ
ရှင်ပင်ခရုဘုရားသည် ထားဝယ်မြို့၊ ကရပ်ပြင်(တ)ရပ်ကွက်၊ ပုထိုးကျောင်းလမ်းတွင် တည်ရှိ၍ ရှင်ကိုးရှင်အစဉ်တိုင်းတွင် နံပါတ်(၁)၌တည်ရှိပါသည်။ ဘုရားတည်ရှိသောနေရာတွင် ထားဝယ်အခေါ် ရှားပင်(ခရေပင်)နှစ်ပင်ပေါက်ရောက် စည်ပင်ခဲ့ရာ ထိုခရေပင်နှစ်ပင်အလယ်တွင် ဧရာမခရုကြီးတစ်ကောင် ပေါ်လာခဲ့ရာမှ ခရုခွံပေါ်တွင်စေတီ တည်ခဲ့သည်ဟုဆိုခဲ့ပါသည်။ “ ရှားပင်(ခရေပင်)နှစ်ပင်နှင့် ခရုပေါ်မှ ဘုရား ” ဟုခေါ်လာရာမှ “ရှင်ပင်ခရုဘုရား” အမည်တွင်လာသည်ဟု ဆိုရိုး ရှိခဲ့ပါသည်။ ၁၉၉၆ခုနှစ်၊ မတ်လ(၂၆)ရက်နေ့တွင် ထားဝယ်မြို့၊ ကရပ်ပြင်(တ)ရပ်ကွက်၊ တစ်ရပ်ကွက် လုံးနီးပါးမီးလောင်ခံရ၍ စေတီတော်အရှေ့ဘက်သိမ်တော်ကြီးမှာ ထူးဆန်းစွာမီးကွင်းကျန်ခဲ့ပြီး စေတီတော်မြတ်၏ သာသနာရောင်ဝါ ပိုမို၍ထွန်းတောက်ခဲ့ပါသည်။ ရှင်ပင်ခရုစေတီတော်မြတ်ကြီး တွင် တင်လှူ ပူဇော်ထားခဲ့သည့် စိန်ဖူးတော်နှင့် ငှက်မြတ်နားတော်ကို (၁.၁၀.၂၀၀၅)ရက်၊ စနေနေ့၊ နံနက်(၃)နာရီခန့်တွင် မသာမာသူတစ်ဦးမှ ခိုးယူရန်ကြိုးစားစဉ် စိန်ဖူးတော်နှင့်အတူ အထက်ပစ္စယံပေါ်မှ ပြုတ်ကျပြီး ရပ်ကွက်သူ၊ ရပ်ကွက်သားများမှ ထားဝယ်မြို့မရဲစခန်းသို့ ပို့ဆောင် ခဲ့ပါသည်။ ထိုအချိန်မှစ၍ ရှင်ပင်ခရုဘုရားစေတီတော်သည် မီးကွင်းသည့်အပြင် မသာမာသူခိုးသား ရန်သူများ စော်ကားပြုမူခြင်းမပြုနိုင်သော တန်ခိုးကြီးဘုရားအဖြစ် တန်ခိုးတော်ပိုမိုပွင့်လင်း ကျော်ကြားလာခဲ့ပါသည်။ ထားဝယ်မြို့ကျက်သရေဆောင်ဖြစ်သော ရှင်ကိုးရှင်သမိုင်းဝင်ဘုရားများတွင် တစ်ဆူပါဝင် ဖြစ်သော ရှင်ပင်ခရုဘုရားစေတီတော်မြတ်ကြီးအား ရေရှည်တည်တံ့ပြီး ကျက်သရေမင်္ဂလာအပေါင်း ခညောင်းစွာဖြင့် ဖူးမျှော်နိုင်ကြရန်အတွက် ဘုရားဂေါပကအဖွဲ့၊ မြို့မိ/ ဖများ၊ ရပ်ကွက်သူ/ သားများ အပါင်းတို့မှ စည်းလုံးညီညွတ်စွာဖြင့် တက်ညီလက်ညီပူးပေါင်း၍ အာရုံခံတန်ဆောင်းနှင့် ဓမ္မာရုံအဆောက်အဦမျာကို ခမ်းနားထည်ဝါစွာ ပြုပြင်မွန်းမံထားသဖြင့် ဖူးမြင်ကြည်ညိုရသူအပေါင်း စိတ်နှလုံးကြည်နူးဖွယ်ရာဖြစ်ပြီး ထားဝယ်သူ/ သားတို့၏ ဂုဏ်ယူဖွယ်ရာပြယုဉ်တစ်ခုအဖြစ် အစဉ်အမြဲတည်ရှိနေမည်ဖြစ်ပါသည်။ (၂) ရှင်မုတ္ထီးဘုရား ရှင်မုတ္ထီးဘုရားသည် တနင်္သာရီတိုင်းဒေသကြီး၊ ထားဝယ်ခရိုင်၊ ထားဝယ်မြို့နယ်၊ ရှင်မုတ္တီးကျေးရွာ၊ ထားဝယ်-မြိတ်ကားလမ်းမကြီးပေါ်တွင် တည်ရှိပြီး ထားဝယ်မြို့နယ်မှ (၆)မိုင်ခန့်ကွာဝေးပြီး ရှင်ကိုးရှင် ဘုရားများတွင် တစ်ဆူအပါအဝင်ဖြစ်ပါသည်။ အေဒီ ၁၄၃၈ခုနှစ်၊ မြန်မာသက္ကရာဇ် ၈၀၀ပြည့်နှစ်ခန့်တွင် သီဟိုဠ်ကျွန်း၌ အုပ်စိုးလျှက်ရှိသော ဆဋ္ဌသီရိပရက္ကမဗာဟုမင်းသည် ပင်လယ်ရပ်ခြားဒေသများတွင် သာသနာထွန်းကားစေလိုသဖြင့် ဗောဓိညောင်သားဖြင့် ရုပ်ပွားတော်(၄)ဆူ ထုလုပ်ကာဖောင်လေးစင်း တွင်အသီးသီးတင်ဆောင်လျှက် အဓိဌာန်ပြု၍ ပင်လယ်ပြင်သို့ မျှောလိုက်လေသည်။ ယင်းလေးဆူအနက် တစ်ဆူသည် ပုသိမ်မြို့သို့ရောက်ရှိ၍ ရွှေမုဋ္ဌောဘုရားဟူ၍လည်းကောင်း၊ တစ်ဆူသည်ကျိုက်ထိုမြို့သို့ ရောက်ရှိ၍ကျိုက်ပေါလောဘုရားဟူ၍လည်းကောင်း၊ တစ်ဆူသည်ကျိုက္ခမီမြို့ သို့ရောက်ရှိ၍ ကျိုက္ခမီရေလယ်ဘုရားဟူ၍လည်းကောင်း အမည်ပေး၍ တည်ထားပူဇော်ခဲ့ကြပြီး ကျန်တစ် ဆူမှာထားဝယ်မြို့သို့ရောက်ရှိ၍ ရှင်မုတ္တီးဘုရား ဖြစ်လာသည်ဟု အဆိုရှိခဲ့ပါသည်။ ထားဝယ်မြို့ဖက်သို့ ရောက်ရှိလာသော ဆင်းတုတော်တင်ဖောင်တော်သည် မြောက်ဖက်ဆန်၍ ထားဝယ်မြစ်အတွင်းဝင်လာကာ မြစ်လယ်သောင်ခုံတွင် ဆိုက်နားလေသည်။ ထိုသောင်ခုံမှတစ်ဖန် အရှေ့ ဖက်ရှိထားဝယ်မြစ်ခွဲဖြစ်သော စော်ဝချောင်းသို့ ဘုရားဖောင်ဝင်သွား၍ ဆိုက်ကပ်ရပ်နားပြီး ထိုနေရာတွင် ဘုရားဆင်းတုတော်ဖောင်အား လူအများလာရောက် ပင့်ဆောင်ကြရာမရသဖြင့် မုတ္တသုခနာဂရမြို့ (ရှင်မုတ္ထီး)နေ သီလရှင်မယ်ဧသီကအိပ်မက်အရ ချည်ပင် (၇)ပင်ကို သင်္ကန်းတုံး၌ချည်လျက် ဆုတောင်း အဓိဌာန်ပြု၍ ပင့်ဆောင်ပေးခဲ့သည်။ ယနေ့ဖူးမြင်ရသော ရှင်မုတ္ထီးရုပ်ပွားတော်သည် မူလကမျှောလာသော ရုပ်ပွားတော်မဟုတ်ပေ။မူလ ရုပ်ပွားတော်သည်ကျောက်၊သံ၊ပတ္တမြားစသောတန်ဖိုးရှိရတနာများနှင့်ပြုလုပ်ထားသဖြင့်သောင်းကျန်းသူခိုးသားရန်သူ တို့၏ အန္တရာယ်ကို ကာကွယ်နိုင်စေရန် လက်ရှိရုပ်ပွားတော်အတွင်းသို့ဌာပနာထား၍ ကိုးကွယ်ပူဇော်ထား သည်ဟု အဆိုရှိပေသည်။