ဘုရားအမည်	လေးမျက်နှာစေတီတော်မြတ်ကြီး
တိုင်းဒေသကြီး/ပြည်နယ်	ပဲခူးတိုင်းဒေသကြီး
Website Address	ဘုရားသမိုင်းများကြည့်ရန်
တည်နေရာ	ပေါက်ခေါင်းမြို့နယ်
သမိုင်းကြောင်းရာ
သာသနသက္ကရာဇ် (၁၀၁)ခုနှစ်၌ ဒွတ္တဘောင်မင်းကြီး၏ သားတော်အိမ်ရှေ့မင်းသည် အခြံအရံများနှင့်အတူ တောစခန်းထွက်ခဲ့ရာ သီရိခေတ္တရာမြို့၏ အရှေ့မြောက်ဘက် (၂)ယူဇနာ ကွာဝေးသော တောအတွင်းသို့ရောက်လာပါသည်။ ထိုအချိန်မှာပင် အင်းမတိုက်နယ်ရှိ တောကြီးအတွင်း ၌ တောလိုက်မုဆိုးများသည် စိုင်ဖြူကြီးတစ်ကောင်တွေ့ရှိ၍ လေးဖြင့်ပစ်ရန် လိုက်လာကြပါသည်။ စိုင်ဖြူကြီးသည် ကြောက်လန့်တကြား တောတောင်အထပ်ထပ်ကိုဖြတ် ကျော်ပြေးလွှားခဲ့ရာ ပင်ပန်းနွမ်းနယ်၍ ရေအလွန်ဆာသဖြင့် (ယခု စိုင်ပစ်အင်းခေါ်ရွာအနီးရှိ) အင်းကွက်အတွင်းဆင်း၍ ရေသောက်ချိန်တွင် မုဆိုးများမှီလာခါအဆိပ်လူးမြှားဖြင့် ပစ်ခတ်လိုက်ပါသည်။ စိုင်ဖြူကြီးသည် နာကျင်ကြောက်လန့်၍ ခြေဉီးတည်ရာပြေးအလာတွင် (ယခုလေးမျက်နှာစေတီတော်တည်ထားသည်) ကုန်းထိပ်ပေါ်အရောက်၌ ခဏရပ်တန့်၍ ဟိုသည် လည်ကာရန်သူရှိမရှိကြည့်ပြီး မြောက်အရပ်သို့ ပြေးလွှားပါသည်။ ထိုအချိန်တွင် သားတော်အိမ်ရှေ့မင်းသည် ဆိတ်ငြိမ်လှစွာသော သစ်တောကြီး အတွင်း၌ သာယာသော တောင်ကုန်းထိပ်ပေါ်တွင် မမြင်စဖူးထူးဆန်းသော စိုင်ဖြူကြီးရပ်နေသည်ကို မြင်ရသဖြင့် စိတ်တွင်ကြည်နူး နှစ်သက်မှုပီတိထူး ဖြစ်ပေါ်လာ၍ ထိုပီတိမှတဆင့်တက်ကာ ဘုရားရှင်၏ ဂုဏ်တော်များကို စိတ်အစဉ်မှာထင်မြင်လာသဖြင့် စိုင်ဖြူကြီးရပ်သော တောင်ကုန်းထိပ်၌ ဉာဏ်တော် လေးတောင်မျှရှိသော စေတီငယ်တစ်ဆူကိုတည်ထားခဲ့၍ စိုင်ဖြူရပ်စေတီတော်ဟု အမည်တွင်လေ သည်။