ဘုရားအမည်	သမိုင်းဝင်ဆုတောင်းပြည့် မြို့နာမ်ရွှေစေတီတော်မြတ်ကြီး
တိုင်းဒေသကြီး/ပြည်နယ်	ကယားပြည်နယ်
Website Address	ဘုရားသမိုင်းများကြည့်ရန်
တည်နေရာ	လွိုင်ကော်မြို့
သမိုင်းကြောင်းရာ
မြန်မာသက္ကရာဇ် (၁၂၀၀)ပြည့်နှစ်တွင် အလောင်းမင်းတရားကြီးသည် ယိုးဒယားပြည်၊ အယုဒ္ဓယမြို့သို့ စစ်ချီရာ လမ်းတစ်လျှောက်၌ သဲပုံစေတီများ တည်ထားကိုးကွယ်ခဲ့ရာ ယခင် ကန္ဒရ ဝတီနယ်၊ ယခု ကယားပြည်နယ်၏ မြို့တော်လွိုင်ကော်(ယခင် သီရိဒေါရွာ)၏ ဦးထိပ် နေရာဖြစ်သော ယခုစေတီတော် နေရာတွင် အောင်မြေနင်း၍ “အောင်မြေစေတီတော်” အဖြစ် သဲပုံစေတီတော်တစ်ဆူကို တည်ထားကိုးကွယ် ခဲ့ပါသည်။သီရိဒေါရွာ(ယခုလွိုင်ကော်မြို့)တည် ဦးသီရိ၏ ကြီးမြတ်သော လုံ့လဥဿဟကြောင့် မန္တလေး ရတနာပုံမြို့ တည် မင်းတုန်းမင်းကြီး၏ ထူးကဲမြင့်မြတ်လှစွာသော မေတ္တာတော်ဖြင့် ကန္ဒရဝတီနယ် အတွင်း “ဗုဒ္ဓမြတ်စွာ သာသနာ ရောင်ဝါနေလ ထွန်းလင်းတောက်ပစေရေး” အကျိုးကို ရည်ရွယ်ကာ ချီးမြှင့်ပူဇော်ခွင့်ပေးသနား ခဲ့သည့် “ပဉ္စမအကြိမ် သင်္ဂါယနာတင် ပိဋကတ် သုံးပုံနှင့်တကွ မွေတော် ဓါတ်တော်စစ် ဖောင်တော်ဦး စေတီတော်မြတ်”တို့ကို ယခင်က ရှေးကျောင်းတော်ကြီးဖြစ်တော် မူသော ယခုရွှေကျောင်းတိုက်ကြီး၏ ဂန္ဓကုဋီတိုက်အတွင်း ခေတ္တကိန်းဝပ်စံထား၍ လွိုင်ကော်မြို့နေ တိုင်းရင်းသားပြည်သူအပေါင်းတို့၏ သက္ကစ္စ ဂါရဝပူဇော်မှုကို (၉)ရက်ကြာ အပူဇော်ခံစေခဲ့ပါသည်။ ယင်းနောက် လွိုင်ကော်မြို့၏ (အာယုအရပ်)“အရှေ့ မြောက်အရပ်”၊ မြို့ဦးထိပ်တွင် (မြို့တော်ဖြစ်လာမည့် သီရိဒေါရွာအား မြို့နာမ်သင့်စေမည့် ရည်ရွယ်ချက်ဖြင့်) ပြည့်ရှင်မင်းကြီး၏ မိန့်ကြားချက်နှင့်အညီ “ဉာဏ်တော်ကိုးတောင်မြင့်လျက် မန္တလေးရတနာပုံ နေပြည်တော် မှ ပင့်ဆောင်လာခဲ့သည့် “ပဉ္စမ သင်္ဂါယနာတင် စာပေပိဋကတ်သုံးပုံနှင့် သရီရဓါတ်တော်မွေတော်”တို့ကို စနစ်တကျ ဌာပနာကာ သဲပုံစေတီမှ ရွာနာမ်စေတီတော်မြတ်အဖြစ် တည်ထားကိုးကွယ်ခဲ့ပါသည်။ သီရိဒေါရွာတည်စဉ်က “ရွာနာမ်စေတီ”ဟု ခေါ်ခဲ့သော်လည်း သီရိဒေါရွာမှ လွိုင်ကော်မြို့အဖြစ် တိုးတက် ပြောင်းလဲလာရာ ယင်းစေတီတော်အား “မြို့နာမ်စေတီတော်”အဖြစ် ပြောင်းလဲကိုးကွယ်ခဲ့ပါသည်။ မြို့နာမ်စေတီတော်သည် သာသနာနှစ်(၂၅၂၆)ခု၊ ကောဇာသက္ကရာဇ်(၁၃၄၄)ခုနှစ်၊ တော်သလင်း လဆုတ် (၈)ရက်နေ့တွင် သဘာဝဘေးဒဏ်ကြောင့် ထီးတော်မြေခပျက်စီးခဲ့ရာ မြို့နာမ်စေတီတော် မဟာပဋ္ဌာန်းဝတ် အသင်းအကျိုးတော်ဆောင် ဥပါသကာအဖွဲ့က ကိုးတောင်ပြည့်စေတီတော်မှ ဉာဏ်တော်အမြင့်(၃၆)ပေအဖြစ် တိုးတက်ပြုပြင်ကာ တည်ထားကိုးကွယ်ခဲ့ပါသည်။ ထိုမှတစ်ဖန် ကယားပြည်နယ်ငြိမ်ဝပ်ပိပြားမှုတည်ဆောက်ရေးအဖွဲ့ ဥက္ကဋ္ဌ၊ အရှေ့ပိုင်းတိုင်း စစ်ဌာနချုပ်၊ ဒုတိယတိုင်းမှူး၊ ဗိုလ်မှူးချုပ်မောင်ကြည်ဦးဆောင်လျက် “မြို့နာမ်စေတီ ဘက်စုံ ပြုပြင်တည်ထားကိုးကွယ်ရေး ဦးစီးအဖွဲ့”က ဉာဏ်တော်အမြင့်(၇၂)ပေအထိ ထပ်မံတိုးမြှင့် ပြုပြင်ကာ ကောဇာသက္ကရာဇ်(၁၃၅၃)ခုနှစ်၊ တပေါင်းလဆန်း(၁)ရက်နေ့၊ (၄-၃-၁၉၉၂)ရက်နေ့တွင် ရွှေထီးတော် အသစ် တင်တော်မူပြီး “သမိုင်းဝင် ဆုတောင်းပြည့်မြို့နာမ်ရွှေစေတီတော်”အဖြစ် ဘွဲ့တော်တွင်စေကာ တည်ထားကိုးကွယ်ခဲ့ပါသည်။