ထို့အတူရတနာဃယရွှေအိမ်ပေါ်ရှိ စေတီတော်လေးဆူမှာလည်း ဟောင်းနွမ်းနေပြီဖြစ်၍ မဟာဗောဓိစေတီပုံစံတူ ဘုရားလေးဆူကို ပြုပြင်ပါသည်။ နှစ်ကျိပ်ရှစ်ဆူစေတီတော်ကိုလည်း ရှစ်ဆူကပ်ကျော်စေတီတော်ဟု ဘွဲ့အမည်ဆက်ကပ်ပြီး ပြန်လည်တင်ထားပါသည်။ မဟာဗောဓိ စေတီတော်ကြီး၏ ထောင့်လေးထောင့် အောက်ပစ္စယံမှာလည်း ပွင့်တော်မူပြီး ဘုရားရှင်လေးဆူကို လည်း ထိုင်း၊ ဂျပန်၊ မြန်မာအနုပညာလက်ရာသုံးမျိုးဖြင့် တည်ထားကိုးကွယ်ပါသည်။

ဓမ္မာလင်္ကာရဆရာတော်ဘုရားကြီး ပေးအပ်ချီးမြှင့်ခဲ့သော သီရိလင်္ကာနိုင်ငံ မြတ်စွယ်တော်ပွား တစ်ဆူကိုလည်း စွယ်တော်တိုက်ပြုလုပ်ပြီး တည်ထားလှူဒါန်းစေပါသည်။ ဘုရားအလောင်းတော်အား သုဇာတာသူဌေးသမီး ဃနာနို့ဆွမ်းဆက်ကပ်နေပုံ၊ ဘုရားအလောင်းတော် ဒုက္ကရစရိယ ကျင့်နေပုံ၊ ဆံတော်ပယ်နေပုံများကိုလည်း ကျောင်းဆောင်တော်များ ဆောက်လုပ်၍ အလှူရှင်များအား လှူဒါန်း စေခဲ့ပါသည်။

ဒုတိယသတ္တာဟဟု ခေါ်ဆိုသော အနိမိဿကုန်းတော် အဟောင်းကြီးကိုငုံ၍ မဟာဗောဓိပုံစံ တူစေတီငယ်တစ်ဆူကို အိန္ဒိယနိုင်ငံ ပုံစံအတိုင်းအလှူရှင်များမှ ကျပ်သိန်း(၄၀၀)ကျော် အကုန်အကျ ခံကာ လှူဒါန်းကြပါသည်။ အိန္ဒိယနိုင်ငံ၊ ဗာရာဏသီမြို့ မိဂဒါဝုန်၌ရှိသော ဓမ္မက္ကမုဒြာရုပ်ပွားတော် ပုံစံတူ ဗုဒ္ဓဆင်းတုတော် တစ်ဆူကိုလည်း အလှူရှင်များ ဖိတ်ခေါ်၍ ထုလုပ်လှူဒါန်းစေခဲ့ပါသည်။

ချမ်းမြေ့ရိပ်မြိုင်ဆရာတော်သည် စေတီတော်ရင်ပြင် တိုးချဲ့ခြင်း၊ မြေထိန်းနံရံများပြုလုပ်ခြင်း၊ ကြွေပြားခင်းခြင်းစသည့် လုပ်ငန်းများကို မတည်လှူဒါန်းပါသည်။ ဓာတ်တော်တိုက်တန်ဆောင်း၊မြတ်စွာဘုရား တာဝတိံသာနတ်ပြည်မှ လူ့ပြည်သို့ သက်ဆင်းကြွလာပုံနှင့် ဖွား၊ ပွင့်၊ ဟော၊ စံ ဟု ဆိုရိုးစကားရှိသည့်အတိုင်း ဖွားတော်မူပုံ၊ ပွင့်တော်မူပုံ၊ တရားဦး ဓမ္မစကြာဟောတော်မူပုံ၊ ပရိနိဗ္ဗာန်စံတော်မူပုံ ရုပ်ပွားတော်များကိုလည်း ထုလုပ်၍ အလှူရှင်များအား လှူဒါန်းစေခဲ့ပါသည်။

ဘုရားဖူးရဟန်းရှင်လူများ၊ မြန်မာနိုင်ငံအရပ်ရပ်ရှိ စေတီပုထိုးများကို တစ်နေရာတည်း တစ်စု တည်းဖူးမျှော်နိုင်စေရန် ရည်ရွယ်ပြီး မဟာမြတ်မုနိပုံစံတူ ကြေးသွန်းရုပ်ပွားတော်၊ ဆုတောင်းပြည့် ကြေးသွန်းရုပ်ပွားတော်၊ ရွှေတိဂုံပုံတူ စတီးရွှေရောင်စေတီ၊ စစ်ကိုင်းကောင်းမှုတော်ပုံစံတူ စေတီ၊ ကျိုက်ထီးရိုးစေတီတော်တို့ကိုလည်း အလှူရှင်များက လှူဒါန်းကြပါသည်။

ထိုင်းနိုင်ငံရောက် မြန်မာရွှေ့ပြောင်းအလုပ်သမားများမှလည်း မဟာဗောဓိစေတီတော်ကြီး၌ ရဟန်းရှင်လူ ပြည်သူအားလုံး ဖူးမျှော်ကြည်ညိုနိုင်စေရန်အတွက် ဗုဒ္ဓရုပ်ပွားဆင်းတုတော်များကို ပေးပို့လှူဒါန်းကြပါသည်။ ထို့အပြင် မြတ်စွာဘုရားသည် နောက်ပါသံဃာတော်များခြံရံပြီး ကပ္ပလိ ဝတ်ပြည်သို့ ဆွမ်းခံဝင်ပုံနှင့် နှစ်ကျိပ်ရှစ်ဆူ ဗုဒ္ဓရုပ်ပွားတော်များကိုလည်း အလှူရှင်များက လှူဒါန်း ပူဇော်ကြပါသည်။

ဗုဒ္ဓရုပ်ပွားတော်များ သီတင်းသုံးစမ္ပယ်သည့် ကျောင်းဆောင်တော်များ၊ စင်္ကြံလမ်းများကို ဆရာကြီးဦးလှိုင်ဝင်းနှင့်အဖွဲ့မှ တာဝန်ယူတည်ဆောက်ပေးပါသည်။ မဟာဗောဓိစေတီတော်ကြီး ရန်ပုံငွေရရှိရန် အတွက်လည်း ဈေးဆိုင်ခန်းများ ဆောက်လုပ်၍ ရန်ပုံငွေများ ရှာခဲ့ပါသည်။