နိဗ္ဗာန်ဆင်းတု လျောင်းတော်မူ ရုပ်ပွားတော်မြတ်ကြီး ပြန်လည်ပေါ်ထွန်းလာသော အခါ အင်္ဂတေများ ကွာလျက် အုတ်ရိုးပေါ်နေသည်မှအပ များစွာပျက်စီးခြင်းမရှိကြောင်း တွေ့ရှိရပါသည်။

ပေါ်ပေါက်လာသော ဆင်းတုတော်ကြီးအား အုတ်ဖိုဆရာတော် ဦးယောက်နှင့် ကလျာဏီဆရာတော် ရတနဓမ္မထေရ်တို့အား အမှူးထားလျက် ဦးမင်းခေါင်၊ ဦးသာခေါင်၊ ဦးလှဘော်၊ ဦးဘိုးအေးတို့သည် ရုပ်ပွားတော်မြတ်ကြီး၏ ဦးခေါင်းတော်၊ လည်ပင်းတော်၊ အုံးတော်များကို အင်္ဂတေသစ်တင်ခြင်း၊ မျက်နှာတော်ကိုဖွင့်ရန် ဆေးဖြူတင်ခြင်းစသော ကောင်းမှုတို့ကို ပြုခဲ့ပါသည်။ ထိုသို့ကောင်းမှုပြုရန်အတွက် တစ်ယောက်လျှင် ငွေငါးရာကျပ်စီစုကာ စုစုပေါင်း ငွေနှစ်ထောင်ကျပ်ကို အကုန်ခံကုသိုလ်ပြုကြပါသည်။ သက္ကရာဇ် ၁၂၅၃ ခု၊ နတ်တော်လပြည့်၊ အင်္ဂါနေ့မှ လပြည့်ကျော်(၂)ရက်၊ ကြာသပတေးနေ့အထိ ပွဲတော်ခံကာ မျက်နှာတော်ဖွင့်လှစ်ခဲ့ကြောင်း၊ ထိုနှစ်မှစ၍ ရွှေသာလျောင်း ပွဲတော်ကို နှစ်စဉ် နတ်တော် လပြည့်နေ့၌ ကျင်းပသော အစဉ်အလာ ဖြစ်ခဲ့ပါသည်။