မြန်မာသက္ကရာဇ် ၁၃၃၄ ခု ခန့်တွင် ကေလဇာတီဘုရားမှ နှစ်ကျိပ်ရှစ်ဆူဆင်းတုတော်များမှ (၂၁)ဆူ ဒုတိယအကြိမ် အခိုးခံခဲ့ရပါသည်။ ဖြစ်စဉ်အကျဉ်းချုပ်မှာ ကေလဇာတီဘုရား ဂန္ဓကုဋီတိုက်တွင် နှစ်ကျိပ်ရှစ်ဆူဘုရားများစံမြန်းစဉ် မနက် (၅) နာရီခန့်တွင် ဘုရားကို စောင့်ရှောက်နေသော စကားမပြောတတ်သည့် ဦးတင်ရွှေမှ ဘုရားဝေယျာဝစ္စ လူငယ်အဖွဲ့ခေါင်းဆောင် ဦးမောင်မောင်ကြည်အား လာရောက်နှိုး၍ ဘုရားများ အခိုးခံရကြောင်း အကြောင်းကြားခဲ့ပါသည်။  လူငယ်အဖွဲ့မှ လာရောက်စစ်ဆေးရာ ဂန္ဓကုဋီတိုက်အဝင်တွင် ခြေရာနှစ်ခုတွေ့ရှိပြီး တံခါးသော့အား သံဖြတ်လွှဖြင့် တိုက်ဖွင့်ထား ပြီး ဘုရားဆင်းတုတော် (၂၁) ဆူပျောက်ဆုံးနေသည်ကို တွေ့ရှိရပါသည်။ တွေ့ရှိသည့် ခြေရာအား တိုင်းတာ မှတ်သား၍ စုံစမ်းခဲ့ကြပါသည်။ မနက် ၁၀ နာရီခန့်တွင် တောင်ငူမြောက်ဖက် သင်္ချိုင်း အနီးနေထိုင်သူ ပြည်သူတစ်ဦးမှ သတင်းလာပေးပါသည်။ ည ၂ နာရီလောက်တွင် ပူလို့အိပ်မပျော်ချိန် ဂုန်နီအိတ်နှင့် ထုပ်ထားသော အိတ်တစ်အိတ် အား ထမ်း၍ လူတစ်ဦး ခပ်သုတ်သုတ်လျှောက်လာပါသည်။ ၎င်းတို့ရှေ့ရောက်စဉ် ထိုသူသည်နောက်ချေးပုံကို တက်နင်းမိပြီး လဲသွားရာ မသင်္ကာသဖြင့် ဘုရားအား လာရောက်သတင်းပို့ခြင်းဖြစ်ပါသည်ဟု သတင်းပေးပို့ခဲ့ပါသည်။ ဘုရားမှတာဝန်ရှိသူများ က ချော်လဲသည့်နေရာသို့သွားကြည့်ရာ တိုင်းထားသည့်ခြေရာနှင့် ချော်လဲသူ၏ခြေရာမှာ အတိုင်းအတာတူညီနေ ပါသည်။ သို့ဖြစ်၍ ဘုရားဝေယျာဝစ္စအဖွဲ့မှ ပျောက်ဆုံးသွားသော ဘုရား (၂၁) ဆူသည် သင်္ချိုင်းအတွင်းပင် ရှိသည်ဟု တွေးတောမိခဲ့ကြပါသည်။ သို့ဖြစ်ပါ၍ ဘုရားဂေါပကများနှင့် လူငယ်အဖွဲ့များမှ ငွေလှံသင်္ချိုင်းအား ည(၈)နာရီ၊ မြောက်သင်္ချိုင်းအား ည(၉)နာရီ တွင် ဝင်ရောက်ရှာဖွေမည်ဟု ဆုံးဖြတ်ခဲ့ကြပါသည်။ ရှာဖွေမည်ဟု ဆုံးဖြတ်ထားသည့် အချိန်မတိုင်မီ မြောက်သင်္ချိုင်းအား ည (၈)နာရီခန့်တွင် အဖွဲ့ (၅)ဖွဲ့ ဖွဲ့၍ ဝိုင်းထားကြစဉ် ည (၈း၃၀) တွင် ၎င်းသင်္ချိုင်းမှ ဆိုက်ကားတစ်စီးသည် အထုပ်နှစ်ထုပ်အား ရှေ့တစ်ထုပ်၊ နောက်တစ်ထုပ် တင်၍ ထွက်လာခြင်းကို မြောက်သင်္ချိုင်း သံလမ်းအရှေ့ဖက် အထွက်တွင် တွေ့ရှိခဲ့ပါသည်။ လူငယ်များမှ ဝိုင်းထားသောအခါ ဆိုက်ကားပေါ်မှသူက ဓားဖြင့် ခုခံတိုက်ခိုက်ခဲ့ပါသည်။ လူငယ်များက လောက်လေးများဖြင့် ဝိုင်းပစ်ခဲ့ရာ အဆိုပါသူသည် ထွက်ပြေးသွားခဲ့ပါသည်။ အထုပ်များကို ဖြေကြည့်ရာ ရုပ်ပွားတော် (၂၁)ဆူလုံး ပြန်ရရှိ ခဲ့ပါသည်။ ထွက်ပြေးသူကို မမိခဲ့သဖြင့် ဆိုက်ကားပိုင်ရှင် အား အရေးယူခဲ့ပါသည်။