သက္ကရာဇ်(၉၁၄)ခုတွင် တည်ထားပြီးစီးခဲ့သော မဟာမုနိကေလဘုရား၏ ဌာပနာကို အောက်ပါအတိုင်းပြုလုပ်စီမံခဲ့ကြပါသည်၊၊
ဘုရင့်နောင်မင်းကြီးသည် ဌာပနာတိုက်တည်ရန်အတွက်တောင်ငူမြို့အရှေ့ဘက်(၇)မိုင် အကွာတွင်ရှိသော ကျောက်တောင်မှ သလင်းကျောက်ကို အဝန်း(၁၀)တောင်ပတ်လည် ဒုတညှိ ကျောက်ပြားများနှင့် အလျားနှစ်ထောင့်ထွာ၊ ဒုတတောင်ရှိ ထွန်သွားပုံသဏ္ဌာန်တစ်ဖက်ထူ တစ်ဖက်ပါးကျောက်တုံး၊ ကျောက်ပြားများကို ပြုလုပ်စေသည်၊၊ဌာပနာတိုက်ဇောက်(၁၂)တောင်၊ အကျယ်(၁၀)တောင်တူးစေသည်၊၊ ပထမကျောက်ပြား(၃)ချပ်ခင်းသည်၊၊ ၎င်းအပေါ်မှအလားတူ သံပြား၊ ကြေးပြား၊ ငွေပြား၊ ရွှေပြားခင်းသည်။အထူးအပါးမညီညွတ်သော ကျောက်ပြားများကို အထူအပေါ်မှထား၍ ပတ်လည်တွင် စိုက်စေသည်။ ဝန်းဝိုင်းသောကျောက်ပြားများကို ဖုံးအုပ်လိုက် သည့်အတွက် အိုးနှင့်အဖုံးအုပ်သကဲ့သို့ဖြစ်စေသည်။

ဤနည်းအတိုင်း တစ်ဆင့်ပြီးတစ်ဆင့်ပြုလုပ်ပြီး
ပထမထပ်တွင် – ဘီလူး၊ ဂုမ္ဘာန်၊ နဂါးတို့၏ ငွေရုပ်
ဒုတိယထပ်တွင် – ဘုရင်တပင်ရွှေထီးနားထွင်းရာ ဟံသာဝတီသို့ ဘုရင့်နောင်နှင့်အတူလိုက်သွား သည့်သူရဲကောင်းမြင်းသည်တော်တို့၏ ရွှေရုပ်၊ ငွေရုပ်
တတိယထပ်တွင် – ရွှေတော်၊ မျိုးတော်တို့ ငွေရုပ်၊ ကြေးရုပ်
စတုတ္ထထပ်တွင် – ဘုရင့်နောင်နှင့်မိဖုရားသခင်ကြီး၊ ခမည်းတော်၊ မယ်တော်များ၏ ရွှေရုပ်၊ ငွေရုပ်၏
ပဉ္စမထပ်တွင်    – နတ်၊ သိကြား၊ ဗြဟ္မာတို့၏ငွေရုပ်
ဆဌမထပ်တွင်   – သာသနာပိုင်ဆရာတော်ဦးနာရဒ၏ ရွှေရုပ်
သတ္တမထပ်တွင်  – မင်းကြီးညိုနန်းဦးဘုရားဆောင်တွင်ကိုးကွယ်တော်မူထားသောပုလဲအဆင်း ဆန်ကျိုးစေ့ပမာဏရှိမြတ်စွာဘုရားလက်ယာလက်ရုံးတော်၏ ဓာတ်တော်(၂)ဆူအနက် မိဖုရား သခင်ကြီးထံတွင်ရှိသော ဓာတ်တော်မြတ်တစ်ဆူ။ ဘုရင့်နောင်ပြည်၊ ပုဂံမြို့များကို သိမ်းသွင်းစဉ်ကရလာသော ဘုရားရှင်၏ဓာတ်တော်များကို တစ်ထွာခန့်ရှိပတ္တမြားနီကြုပ်တွင် ထည့်သွင်း လျက် ရတနာ(၇)ပါးခြယ်လှယ်ထားသော ရွှေအချိန်(၃၀)ကျပ်သားရှိ ပန်းကလပ်ပေါ်တွင် ဓာတ်တော် ကြုပ်ကိုတင်သည်။ ထို့နောက် ရွှေကွန်ယက်အုပ်ပြီး ရွှေအုတ်၊ ငွေအုတ်၊ သံအုတ်၊ ကျောက်အုတ် တို့ဖြင့် ဖုံးဖိသည်။ ပုလဲ၊ နီလာ၊ ဂေါ်မုတ်၊ ဉဿဖယား၊ စိန်ကျောက်တို့ကို ကြဲဖြန့်တော်မူပြီး ဌာပနာ တိုက်ပိတ်တော်မူသည်။
ရွှေအချိန်(၂၅)ကျပ်သားခန့်ရှိရွှေဆင်းတုတော်တစ်ဆူကိုလည်း ထုလုပ်၍ တန်ဆောင်ပြသာဒ် ဆောက်လုပ်ပြီးကိုးကွယ်တော်မူခဲ့သည်။

သက္ကရာဇ်(၉၁၄)ခုနှစ်၊ တော်သလင်းလပြည့်နေ့တွင်အထမြောက်အောင်မြင်ပြီး မဟာမုနိ ကေလဘုရားဟု ဘွဲ့တော်သမုတ်ခဲ့သည်။
သက္ကရာဇ်(၉၃၂)ခုနှစ်တွင် သီဟိုဠ်ဘုရင်ထံမှ ရရှိလာသောဓာတ်တော်များနှင့်အတူ မူလတည် ထားခဲ့သည့် ရွှေချိန်(၂၅)ကျပ်သားခန့်ရှိရွှေဆင်းတုတော်သည် နောင်ဆုတ်ကပ်တွင် မသမာသူလူတို့ ဖျက်ဆီးမည်ကိုထင်တော်မူ၍ဌာပနာတည်ကာ ဉာဏ်တော်(၇)တောင်အမြင့်ရှိစေတီကိုတည်ထား တော်မူခဲ့သည်။
မူလဘွဲ့တော် မဟာမုနိကေလဘုရားမှ မဟာမုနိကေလစေတီဟူ၍ ပြောင်းလဲ၍သမုတ်တော် မူခဲ့သည်။
သက္ကရာဇ်(၁၂၅၀)ခုနှစ်တွင် ဆရာအေးနှင့်ဒေါ်ခိုင်တို့မှဦးဆောင်၍ စေတီပျက်နှင့် ဆင်းတုတော်ကိုငုံ၍ စေတီပျက်အတွင်းမှရရှိသော ကြေးပုရပိုက်တွင်ပါရှိသော ဘွဲ့တော်အတိုင်း မဟာမုနိ ကေလစေတီဟု ဘွဲ့တော်သမုတ်ပြီးဉာဏ်တော်အတောင်(၄၀)ရှိစေတီအဖြစ်တည်ထားပြီး(၇)ရက်သားသမီးတို့၏ ကုသိုလ်ဖြစ်သော ဓာတ်တော်၊ ရွှေ၊‌ ငွေ၊ကျောက်သံပတ္တမြားတို့ကို ဌာပနာတည်ထား ခဲ့ကြပါသည်။
သက္ကရာဇ်(၁၃၇၅)ခုနှစ်တွင် CB ဘဏ်ဥက္ကဌကြီး ဦးခင်မောင်အေးမိသားစုမှ ဉာဏ်တော် အမြင့်(၈၁)ပေမြင့်သောစေတီအဖြစ် ပြုပြင်တည်ထားပြီး (၇)ရက်သားသမီးတို့ကုသိုလ်ဖြစ်သော ဓာတ်တော်များ၊ ဗုဒ္ဓရုပ်ပွားတော်များ၊ ရွှေ၊ငွေ၊ ကျောက်သံပတ္တမြားတို့ကို ဌာပနာတည်ထားခဲ့ပါသည်။