သမိုင်းဝင် နောင်တော်ကြီးမြသာလျောင်း ဗုဒ္ဓရုပ်ပွားတော်မြတ်ကြီး
ပွဲတော်များ
ညောင်ရေသွန်းပွဲ (ကဆုန်လပြည့်)
နှစ်စဉ် ကဆုန်လပြည့်နေ့တိုင်းတွင် ဘုရားကြီးအား ဗုဒ္ဓါဘိသေက အနေကဇာတင်လှူခြင်း၊ ဩဝါဒ ဆရာတော်ကြီးများအား အရုဏ်ဆွမ်းဆက်ကပ် လှူဒါန်းခြင်း၊ ဗောဓိညောင်ပင်အား ညောင်ရေသွန်းပွဲမင်္ဂလာ ကျင်းပခြင်း အစရှိ သည်တို့ကို အစဉ်အလာမပျက် ဆောင်ရွက်ကြပါသည်။
ဝါဆိုသင်္ကန်းကပ်လှူခြင်း (ဝါဆိုလပြည့်)
နှစ်စဉ် ဝါဆိုလပြည့်ကျော်ရက်အတွင်းတွင် ဩဝါဒဆရာတော်ကြီးများအား ပင့်လျှောက်၍ ဝါဆို သင်္ကန်းကပ်လှူခြင်း၊ နေ့ဆွမ်းဆက်ကပ်လှူဒါန်းခြင်း၊ လှူဖွယ်ဝတ္ထုဆက်ကပ်ခြင်း အစရှိသည်တို့ကို အစဉ်အလာမပျက် ဆောင်ရွက်ကြပါသည်။
ဗုဒ္ဓပူဇနိယပွဲတော် (တန်ဆောင်မုန်းလပြည့်)
နှစ်စဉ်နှစ်တိုင်း နောင်တော်ကြီးမြသာလျောင်း ဗုဒ္ဓရုပ်ပွားတော်မြတ်ကြီး ၏ ဗုဒ္ဓပူဇနိယပွဲတော်ကို တန်ဆောင်မုန်းလပြည့်နေ့တိုင်း အစဉ်အလာမပျက် ဆင်ယင်ကျင်းပနိုင်ခဲ့ပြီး ဘုရားကြီးအား ဗုဒ္ဓါဘိသေက အနေကဇာတင်လှူခြင်း၊ မဟာပဋ္ဌာန်းကျမ်းမြတ်အား ရွတ်ဖတ်ပူဇော်ခြင်း၊ သံဃာတော်အရှင်သူမြတ်တို့အား ဆွမ်းဆက်ကပ်လှူဒါန်းခြင်း၊ သံဃာ (၁၀၈)ပါးအား ပင့်လျှောက်၍ လှူဖွယ်ဝတ္ထု ဆက်ကပ်ခြင်း၊ ဧည့်ပရိသတ် များအား စတုဒီသာကျွေးမွေးခြင်း စသည်တို့ကို ဆောင်ရွက်ကြပါသည်။